Gör nice bülend oldığını şân-ı Üveysin
Bu ümmete hem itdiği ihsânı Üveysin
****
Eylerdi ana şâh-ı rüsül hubb-ı teşevvuk
Bî-had idi çün cezbe vü ferzânı Üveysin
****
Ol cebhe-i tâbânın açub vakt-i seherde
Hoş geldi bana dir idi reyhânı Üveysin
****
Arzûlar idi görmeği olmadı mukadder
Çün itdi nihân cismini Yezdânı Üveysin
****
Ashâbına şol kez anı vasf eyler idi kim
Olurlar idi cümlesi hayrânı Üveysin
****
Dir idi sa’âdetle o şâh-ı rûz-ı mahşer
Bir devr ola kim sürile devrânı Üveysin
****
Pes ide şefâ’at nice yüz bin ümmete hem
İrişe nice dertliye dermânı Üveysin
****
Çün hırka-i mergûbesini kıldı vasiyyet
Bahş itdi safâ cânına cânânı Üveysin
****
Gitdiler ana itmeğe teblîg ü emânet
Ashâb-ı güzîn sevgilü yârânı Üveysin
****
Birisi ‘Ömer biri ‘Alî hem birez ashâb
Didiler olaydık nola mihmânı Üveysin
****
Arayub anı buldılar iklîm-i Yemende
Bir çölde kurulmış ulu dîvânı Üveysin
****
Gördükde ‘Ömer köhne pelâs içre didi kim
Hoş geldi bana sîne-i ‘uryânı Üveysin
****
Hem didi gerekmez bana bu câh-ı hilâfet
Görüb yüce olduğını eyvân-ı Üveysin
****
O1 didi birâder seni efdal bilürem ben
Sanma ki ola üstüne rüchânı Üveysin
****
İtdiler ana hırka-i mergûbeyi teslîm
Dünyâ tolusı buldı ferah cânı Üveysin
****
Didi ki revâ gördi mi ol bahr-ı keremden
Bu bürde-i şâhâneyi sultânı Üveysin
****
Pûs eyleyüben başına koydı anı derhâl
Ağlatdı yeri gökleri efgânı Üveysin
****
Ol demde varub secdeye çok itdi münâcât
Hem didi ki yâ Hazret-i Rahmânı Üveysin
****
Bağışlar isen ümmetini eşref-i halkın
Âbâd olur ol dem dil-i vîrânı Üveysin
****
Hem höşnûd olur ‘âşık u ma’şûk ol sebebden
Ol eşref-i mahlûk ulu hâkânı Üveysin
****
Hâtif didi oldı sana bahş sülüs-i ümmet
Bahş itdi sülüs ümmeti Hannânı Üveysin
****
Baş indirüben itdi yine secde Hudâya
Didi dileği cümle-yi ihvânı Üveysin
****
Hâtif didi oldı sülüs-i ümmet dahi bahş
‘Afv eyledi sülüsini Mennânı Üveysin
****
Kuddûsîye olur mı ‘aceb lutfı müyesser
Ol bahr-ı kerem fazl u ‘atâ kânı Üveysin

Ahmed Kuddusi