Hak size gönderdi bizi hıdmet-i irşâd ile
Güç imiş dünyâda ‘işret eylemek ezdâd ile
****
Çekdiğim zahmet meşakkat içinizde bî-hisâb
Yanınızda çün berâberdir sitem imdâd ile
****
Eylik iden kimseye kemlik iden imiş habîs
Noldığınız oldı ma’lûm işbu memkûtât ile
****
Başsız ‘asker gibi herkes kendi cinsiyle gezer
Ülfet itmezler hemîn ‘ubbâd ile zühhâd ile
****
Kaçdım arslandan kaçar gibi Hudâ tevfîk idüb
Ayağımda dürlü dürlü bend ü bağ asfâd ile
****
Aldanub erkek nisâ cümle cihânın nakşına
Eylemişler erler ünsiyyet zen-i bî-dâd ile
****
İçinizde ehl-i dünyâ çokdur ahret ehli az
Ehl-i Mevlâ gizlü bilinmezler aslâ ad ile
****
Kimi bilüb evliyâdan oldığın âgâh olur
Kimi bilmez hîç makamın üns ider enkâd ile
****
Ehl-i dünyâ sûretinde var nice Hak dostları
Saklamış anları halkdan sûret-i berbâd ile
****
Gayret itdim ben sizi îkâz u irşâd itmeğe
Kaçdınız benden nice dem kalb ile ecsâd ile
****
Ben öğüt virdikce size itdiniz buğz u cefâ
Dün ü gün itdim nidâ toldı cihân feryâd ile
****
Cîfe-i dünyâya her kim ki mahabbet eyler ol
Kopısar Kârûn ile Nemrûd ile Şeddâd ile
****
Dahi ahmak kuldur ol kim cennet içün çalışır
Dûr olub ol Bânîden kalur hemân bünyâd ile
****
Olmayınca ‘ışk u ihlâs ehl-i Hak olmaz mürîd
Hâsıl olur kalbde ‘ışk ism-i Hudâyı yâd ile
****
İtmek-ile zikri girer cennete paşa vü mîr
Kavl-i Peygamber-durur bu bil sahîh isnâd ile
****
Hem buyurmuş cümle zikrin efdali tevhîd-durur
Hak celîs olur kulına ismini çok yâd ile
****
Nefsimi ‘add eyledim ehl-i kubûrdan ben bugün
Ülfeti yok gönlümün ezvâc ile evlâd ile
****
Pîr ü ‘âciz olmışam mevtim yakındur şöyle kim
Zikr ü istiğfârdır işim mevte isti’dâd ile
****
Müsta’id mevte bu Kuddûsî fakîr râzî-durur
Hâlikı alırsa nolur cânını is’âd ile

Ahmed Kuddusi