Hak teâlâ çünki kendi diledi
Pâdişâhlığın bu âlem biledi

Zât-ı pâki gizlü genc idi nihân
Diledi kim kıla ol genci ayân

Gizlü gencin halka ızhâr eyledi
Nice dürlü nesneyi vâr eyledi

Geldi sûret âlemine Mustafâ
Tâ ki âlem bula anunla safâ

Bildiniz mi ol Muhammed ne imiş
Dahî bunda gelmeden kande imiş

Sûretâ gerçi Muhammed son idi
İllâ ma’nâda kamudan önde idi

Ma’nâda çün kim mukaddemdir Resûl
Hem hakîkat ol durur asl-ı usûl

Bunca varlığa sebeb hem ol imiş
Âlem ol olduğu için olımış

Sûretâ dahî işit ey pâk-i dîn
Aydayın önden sonra niceydüğin

Aydayın ki nice doğdu ol şerîf
Ol şerîf ü ol latîf ü ol zarîf

Aslını cümle beyân eyleyeyin
Âdem’e değin ayân eyleyeyin

Hem bilesiz tâ irince Ahmed’e
Kimler ata oldu vü kimler dede

Dahî ol nûr nice nakl etdiğini
Kimlere gelüp kime gitdiğini

Tâ bilesiz mevlidi aslı ile
Hem dahî Peygamber’in nesli ile

Tutun imdi cân kulağın bu söze
Tâ beyân idem bu sözü ben size

Haşre dek ger denilirse bu kelâm
Nice haşr ola bu olmaya tamâm

Ger dilersiz bulasız oddan necât
Aşk ile derd ile eydün es-salât