Re’is-i ‘âlimân u fâzılândır Hamza Beg-zâde
Habîb-i ‘ârifân u kâmilândır Hamza Beg-zâde
****
Tonuk gönülleri açar olur ‘âşıklar-ıla yâr
Marîzin zahmına tîmâr kılandır Hamza Beg-zâde
****
Sevişir ehl-i ‘ışk-ıla sever ‘uşşâkı sıdk-ıla
Derûnı derd-i şevk-ıla tolandır Hamza Beg-zâde
****
Ezelden nûş idüb câmı olub mest cümle endâmı
Bu yolda ‘âr ile nâmı atandır Hamza Beg-zâde
****
Seviben cân u dil yârin unutmış fikr-i ağyârın
Yolına yârinin varın koyandır Hamza Beg-zâde
****
Bakub gayretle eflâke döker gözyaşı pek hâke
Beher hâl şâh-ı levlâke uyandır Hamza Beg-zâde
****
Düşüb bir özge sevdâya idüb ikbâli Mevlâya
Gönül fülkini deryâya salandır Hamza Beg-zâde
****
‘Alî anda güzel ismi unutmış ‘âdeti resmi
Hemân ‘ışk odına cismi yanandır Hamza Beg-zâde
****
Kanı bir oldı ol selver sülük ehline hem rehber
Bu yolda terk-i cân u ser urandır Hamza Beg-zâde
****
Ayık sanur gören anı ol ise cür’a sekrânı
Erenler ile devrânı sürendir Hamza Beg-zâde
****
Nasîhat dâ’imâ işi bulunmaz böyle er kişi
Dîn içün gözinin yaşı akandır Hamza Beg-zâde
****
‘Ulûmda râsihü’l-fâzıl fünûnda mâhir ü kâmil
Hakîkat sırrına nâ’il olandır Hamza Beg-zâde
****
Bulur nâs feyzi pendinde celîs ol sen de ‘indinde
Arayub Hakkı kendinde bulandır Hamza Beg-zâde
****
Berâber medh ü zem ana sivâya meyli yok aslâ
Koyub gayrı Hakdan yana varandır Hamza Beg-zâde
****
Oluban şem’e pervâne yanarsın nâr-ı sûzâne
Gözinin yaşını kane katandır Hamza Beg-zâde
****
Girüben râh-ı merdâne viren varını cânâne
Dem-â-dem bahr-ı ‘irfâne talandır Hamza Beg-zâde
****
Görür her şeyde Yezdânı muhîtdür çün bilür anı
Mahabbet hamrına cânı katandır Hamza Beg-zâde
****
Sözimi eyler ol ısgâ bilürsiz kadrini zîrâ
Dimeyüb Hak söze hîç lâ tutandır Hamza Beg-zâde
****
Hilâfet virdi Kuddûsî uyandırsın deyü nâsı
Gönüllerde olan pası yuyandır Hamza Beg-zâde

Ahmed Kuddusi