Hazret-i Rezzâk’a ancak eyle ‘arz-ı ihtiyâc
Virdiğine kâni’ ol eyle rızâsın başa tâc

Ni’met-i ‘ukbâ-yı bâkîde olur dâim sürûr
Ziynet-i dünyâ-yı fânîye gerekmez ibtihâc

Fitnedir evlâd u mâla olma dil-beste sakın
“İnnemâ emvâlüküm” nassına eyle ihticâc

Ağniyâya iltifât itme sana besdir Ganî
Akrabâ vü âşinâdan Hazret-i Yezdân’a kaç

Sohbet-i merdânı her dem bil ganîmet rûz u şeb
Ehl-i dünyâ sohbetiyle olma muhtellü’l-mizâc

Kesret-i asdâfda bir dürr-i vahdet bulagör
Mâsivâ boncukları dilde gerekmez durma saç

Şem’-i kesretle yeter gezdin Salâhî zulmeti
Şems-i vahdet doğsa elbet muntafî olur sirâc