Abdullah Tamamlar-Huda'nın Birliğine

Hudâ’nın birliğine halk-ı ‘âlem hep delîldir
Şerîki yok mu’îni yok Ehad Ferdü Celîl’dir

Eğer olsa idi iki bu mülk olmazdı ma’mûr
Bu mülkün mâlikin bir bilmeyen müşrik rezîldir

Seni bir nutfe iken ahsen-i hey’etde kıldı
Bilirsin aslını bî-şübhe kim mâ-i kalîldir

Kıyâs eyle kamu mahlûku sana kıl tefekkür
Anı bir bilmeye zîrâ tefekkür hoş sebîldir

Dolar kalbe tefekkür itmek ile cezbe-i ‘aşk
Gidilmez ‘aşka cezbe olmayınca yol mehîldir

Dilinden kesme tevhîdi gice gündüz devâm it
Kulacı ehl-i tevhîdin çıkar ‘arşa tavîldir

Resûlullah ‘Alî’ye anı telkîn eylemiş bil
Gözüm nûru çalış tevhîde çün nef’i cezîldir

Bu Kuddûsî fakîrin tut sözünü ey ‘azîzim
Tevekkül eyle Mevlâ’ya ki ol sana vekîldir