İhanet itme sultâna anın esrarı çokdur
Ki yüklenmiş umûr-ı müslimîni bârı çokdur
****
Gice gündüz idelim biz anın içün du’âlar
Güneş gibi toğar üstümize envârı çokdur
****
Hudâya eyleriz kulluk anın biz sayesinde
Çeker gam dün ü gün bizim içün ekdârı çokdur
****
Çalışur itmeye dâ’im bizi hıfz u himaye
Bilür ki bu zemânın halkının esrarı çokdur
****
Bizim içün-durur heb çekdiği mihnet meşakkat
Bilelim kadrini çün şevketi âsârı çokdur
****
Yigirmi cins kamu a’dâ-yı dîn fırsat ararlar
Te’emmül it ki dünyânın katî küffârı çokdur
****
Bilâd-ı Müslimînde hem katî çok ehl-i fitne
Fesâd ister koyun başlı gezer kurtları çokdur
****
Selâtîn-i benî ‘Osmânda var şevket mehabet
Ki a’dânın yüreklerinde korkuları çokdur
****
Halîfe olmasa bir gün biri birini yir nâs
Dime kardaş bu sultânın bize âzârı çokdur
****
Anı halk eylemiş lutfıyla kahra çünki âlet
Beher işinde anın hikmet-i Cebbarı çokdur
****
O bir mir’ât-ı ‘âlem kim bakan görir özini
Bu sırrı bilmeyen câhillerin güftârı çokdur
****
Var ise zâhirâ anda eğer üç beş kem ahlâk
İderiz zann ki bâtında güzel huyları çokdur
****
Hevâ vü nefsine uydı deyü itme tehâvün
Günâhını ider tekfîr mükeffırleri çokdur
****
Değil ma’sûm günâhdan çün bizim gibi beşer ol
Mukannit olma (asla) rahmet-i Gaffârî çokdur
****
Halâ’ik i’tizâr itdikde yârın Kird-gâre
Olur makbul anın ‘özri ki pek a’zârı çokdur
****
Reva mı eylemek ta’yîr du’â itmek yirine
Anın ‘aybını örter sütre-i Settârı çokdur
****
İder tevbe olur tâhir mutahhir ‘akıbet ol
Olınur hüsn-i zan zîrâ mutahhirleri çokdur
****
Eğer dirsen veliyullah idi bunun atası
Diriz ki ol zemânın ehlinin dîndârı çokdur
****
Kabahat bizdedür cümle ki bozdık fi’limizi
Bizim gibi bu vaktin nâsının bî-‘ârı çokdur
****
Yüri sen kendine çâre bulagör turma sofî
Muhammed ümmetinin şahının ensârı çokdur
****
Bu ümme itdiği kulluk savâb ü ecrinin heb
Virilür misli ana ecri bu mikdârı çokdur
****
Kutublar kutbı var ‘âlemde bâtın pâdişâhı
Bunun gibi değil anın hafî bâzârı çokdur
****
Nazar eyler hemân levhe ‘amel eyler anınla
‘Ukûl irmez umûrına ‘acîb işleri çokdur
****
Beder vaz’ eylemiş Hallâk-ı ‘âlem yir yüzünde
Kamu âktâb anın etbâ’-ı hizmet-kârı çokdur
****
Hakîkat şâhıdur ol bu şerî’at pâdişâhı
Bunın gibi kapusında anın kulları çokdur
****
Selâtîn-i cihan cümle anın mahkûmlarıdur
Anın Hak dest-gîri hem dahi nussârı çokdur
****
Elinde kabz u bast u ‘azl ü nasb u re’y ü tedbîr
Yürür hükmi ekâlîmde tasarrufları çokdur
****
Tehî mi zann idersin yohsa sen bu pâdişâhı
O bir bâz-ı hümâyûndur ki bâz-dârı çokdur
****
Bizi bu i’tirâzdur düşüren bunca belâya
Rızâ vü sabr u teslimin faziletleri çokdur
****
Hakîkatde bize oldı bu sultân şeyh ü mürşid
Bizi mühlik olan rencimize tîmârı çokdur
****
Bi-küllî zenblerin başı imiş çün hubb-ı dünyâ
Medâ’in ehlinin bu vech-ile bîmârı çokdur
****
Tecâvüz eyledik biz zînet-i dünyâda haddi
Ki gıbta ider oldık anı kim dînârı çokdur
****
Resul didi cehennem ehlinin çoğı nisâdur
Bunı bilen bilür ki anların evzârı çokdur
****
Didiler yâ Resûlallah nedür zenbi nisanın
Didi sîm ü zere gayet mahabbetleri çokdur
****
Sirayet itdi nisvândan ricale hubb-ı zînet
Ricalin şimdi nisvâna teşebbühleri çokdur
****
Tağıldı zînet-i dünyâ medâ’inden kurâye
‘Umûmen haste oldık cümlenin dertleri çokdur
****
Idüb himmet bu sultân zîneti kaldırdı zîrâ
Zemânın halkının gördi ki istikbârı çokdur
****
Tekebbürden bizi kurtardı kıldı Hakka mahbûb
Sever anları Allah kim tevâzu’ları çokdur
****
Bunun emsali var bizde günâhlar gerçi lâkin
Gurur u kibr ü ‘ucbufi kullara ahtârı çokdur
****
Anınla terbiye eyler bizi Rabbü’l-berâyâ
Dime imdi bu sultânın ki teşdîdleri çokdur
****
Kazandık destimiz ile bu ahvâli kamumuz
Hudâ zulm eylemez kullara hikmetleri çokdur
****
Fakîre tavsiye eyler menâmımda atası
Dir imdâd eyle oğluma ki mihnetleri çokdur
****
Atasının velî oldığına yok şübhe asla
Ulaşur bun deminde bana gayretleri çokdur
****
Bu nazma başladıkda geldi atası düşimde
Du’âlar itdi bana hoşça himmetleri çokdur
****
Öper yüzimi eyler kendi bana çok beşaret
Vasiyyet eyler oğlum bana ibşârı çokdur
****
Yaşım altmış beş olmağ-ıla cismim köhnelendi
Za’îfem gerçi amma nefsimin suçları çokdur
****
Meseldür ‘âşıkın gönli kocamaz olsa da pîr
Beni levm eylemen dostlar ki ‘ışkın nârı çokdur
****
Kocalıkda benim hâlim budur kimi idem levm
Civanların kafasında eser yilleri çokdur
****
Bu Kuddûsî unutmaz hîç du’âdan pâdişâhı
Atasının ana zîra vasiyyetleri çokdur
****
Elinden nesne gelmez gerçi Kuddûsînin amma
Anın içün du’â vü zikr ü istiğfarı çokdur
****
Melek inşân ider sultân içün dâ’im du’âlar
Bu Kuddûsîleyin anın du’âcıları çokdur

Ahmed Kuddusi