Selâtîn-i cihânın a’zamı sultân-ı İslâmbol
Nücûm-âsâ tecemmu’ eylemiş merdân-ı İslâmbol
****
Bilâd-ı Müslimîne kûh-ı kâf-tek sedd-i muhkemdir
Gazâ ecrin alurlar bî-‘aded sükkân-ı İslâmbol
****
Halîfe oldığı yirde biriktir evliyâ dirler
Katı çok bu ecilden sâhib-i ‘irfân-ı İslâmbol
****
İhâta idemez ‘akl-ı beşer esrânnı aslâ
Ne mümkindir bilinmek hikmet-i ferzân-ı İslâmbol
****
Münâcâtı harâbâtı erenler eksen nâsı
Sanur zâhid ki heb füccâr-durur mestân-ı Islâmbol
****
Sıfât-ı halk ile eyler tesettür evliyâullah
Olur bu vech-ile kuvvetli sıddîkân-ı İslâmbol
****
Gürûh-ı ehl-i hâl il ‘ışk u cezbe bî-şümâr anda
Dem-â-dem dost-ıla cünbişde meczûbân-ı İslâmbol
****
Sınık gönülleri ta’mîr iderler hûb devâlarla
Bu ahlâk ile rif’at buldığı a’yân-ı İslâmbol
****
Beşâşet tatlu dil i’zâz u ikrâm u tevâzu’ hem
Tahabbüb hem telattuf pîşe-i yârân-ı İslâmbol
****
Mürüvvet merhamet re’fet-durur ‘âdâtı ol kavmin
Garîb ü bî-kese rağbet ider ihvân-ı İslâmbol
****
Varan ol beldeye irer murâdına mücerrebdür
Olur handân u mesrûr lâ-cerem mihmân-ı İslâmbol
****
Anı medh eylemişdir on sekiz bin ‘âlemin fahri
Budur ez-cümle memdûhiyyete bürhân-ı İslâmbol
****
Eğer ‘âlim eğer câhil eğer sâlih eğer tâlih
Tarîk ehli fakır ü tâcir ü hâkân-ı İslâmbol
****
Kamusı ‘âşıkân-ı Hazret-i Şâh-ı rüsüldür hem
Severler âlî hem ashâbı müştâkân-ı İslâmbol
****
Tolu ‘ilm ü ma’ârif ehli Eflâtûnleyin zâtlar
Muvaffak ma’rifet tahsîline insân-ı İslâmbol
****
Cevâmi’de medârisde ider kesb-i ‘ulûm tullâb
Beher vech-ile büldân üzre var rüchân-ı İslâmbol
****
Tekâvîde zevâyâda çalışur zikre ‘âşıklar
Ki ‘ışk odına yanmak kân dervîşân-ı İslâmbol
****
Kişi sâlihleri sevmekle anlardan olur lâ-büdd
Muhibbân heb ulu kiçi nisâ sıbyân-ı İslâmbol
****
Kazâya râzıyân anlar belâya sâbirân cümle
Rızâ vü sabr u teslîm ü tevekkül şân-ı İslâmbol
****
Ki bir anda yanar meskenleri ‘uryân kalurlar pes
İder biri birini tesliye ‘uryân-ı İslâmbol
****
Bu ‘âlemde virir Yezdân belâyı sevdiğine bil
Sever İslâmbolın mü’minlerin Yezdân-ı İslâmbol
****
Bizim bir kâsemiz kırılsa olunz katı gam-nâk
Cihânda yok-durur her vech-ile akrân-ı İslâmbol
****
Görür özini yahşi ehl-i İslâmboli kem sûfî
Özi düşmân-ı Hak iken olur düşmân-ı İslâmbol
****
Yiyüb içüb giyüb dürlü-be-dürlü ni’metini ol
Teşekkür yirine eyler hemîn küfrân-ı İslâmbol
****
İder buğz u ‘adâvet Kird-gârın dostlarına çün
Kubâb altında dostlarla gezer dostân-ı İslâmbol
****
Kimi görse koyub tartar terâzüsine ol ahmak
Sanursın ki virilmiş destine mîzân-ı İslâmbol
****
İki fırka kılar nâsı biri nâcî biri hâlik
Necât ehlinden eyler nefsin ol nâdân-ı İslâmbol
****
Tekebbür eyleyüb dâ’im öğer özini ol miskîn
Gurûr u ‘ucb-ıla dir çok-durur tuğyân-ı İslâmbol
****
Günâh işler bu ümmet mağfiret eyler Gafûrdur Rabb
Değil mi yohsa ümmetden güneh-kârân-ı İslâmbol
****
Günâhın nef i vardır mü’mine buyurdı Peygamber
Ki oldur ‘âmmenin Lokmânı hem Lokmân-ı İslâmbol
****
‘Abes mi nefs ü İblîs ü hevâ şehvet bu inşânda
İder mi zan ki ‘afv olmaz ‘aceb ‘isyân-ı İslâmbol
****
Olur taksîmde gufrân müznibe ‘isyânı mikdân
İdiser mağfiret Rahmân-ı halk Rahmân-ı İslâmbol
****
Resûl didi ‘azâb yok âhiretde ümmetime hîç
Bu ümmetden değil mi yohsa gümrâhân-ı İslâmbol
****
‘Azâbı ümmetin dünyâda çekdiği belâlardır
Bu ümmetden değil mi sâhib-i îmân-ı İslâmbol
****
Hudâ bu ümmete uyhu virir imiş cehennemde
Cinân içre olurlar şâd-mân giryân-ı İslâmbol
****
İdelim dâ’im istiğfâr cemî’-i mü’minân içün
Be-küllî kulların Hannânıdur Hannân-ı İslâmbol
****
Hadîs-i beşşirû ile ‘amel it sen de ey vâ’iz
Recâ itsün Hudânın rahmetin sekrân-ı İslâmbol
****
Ne tenfîr it ne ta’sîr it hemân teysîr ü tebşîr it
Ne taknît it ümîdi kesmesün meccân-ı İslâmbol
****
Ne teşdîd it ne tazyîk it ki rahmet bahr-i evsa’dur
Ne terhîs it ki ruhsat bulmasun şübbân-ı İslâmbol
****
Recâ vü havfı ta’lîm idüben tergîb ü tehdîd it
Ki kansunlar işidüb pendini ‘atşân-ı İslâmbol
****
Makarr-ı evliyâ vü ‘ârifân ol belde-i zîbâ
Bakuban zâhire itme sakın bühtân-ı İslâmbol
****
Nasîhat eyle kavl-i nerm-ile nâzik-durur anlar
Zemîn ü âsümânın halkı heb a’vân-ı İslâmbol
****
Kebâ’ir irtikâb-ile dinilmez mü’mine kâfir
‘Usâtı itme tekfir olmagıl fettân-ı İslâmbol
****
Bu ümmet ümmet-i merhûmedir pek çok şefî’âtı
Sakın olma idüben sû-i zan ta’ân-ı İslâmbol
****
Halîfe anda olmakla yedi iklîme mir’âtdır
İder inşân melek cin cümle istihsân-ı İslâmbol
****
Cesed ‘âlem halîfe cân diri olmaz cesed ansız
Halîfe ‘âlemin cânı-durur hem cân-ı İslâmbol
****
Nişânı yok velînin kimse bilmez Tenriden gayrı
Dime bu pâdişâh u ‘asker ü dihkân-ı İslâmbol
****
Kabâda şimdi ehlullah gürûhı oldığı içün
Bu Kuddûsî fakîr olmış-durur hayrân-ı İslâmbol
****
Hayâ eyler bu Kuddûsî zelîl çârşûda gezmekden
İdüb zan her kimi görse ki bu arslan-ı İslâmbol
****
Olub meddâh-ı İstanbul bu Kuddûsî hakîr dir kim
Kazâdan saklasun Mevlâ bülenddir şân-ı İslâmbol

Ahmed Kuddusi