Gayra meyl itmez gönül cân başka cânân istemez
Bir olur şehre hükümdâr iki sultân istemez

Bildirir âh-ı şerer-pâşı yok ‘arza ihtiyâc
Âteş-i ‘aşk u muhabbet ketm ü i’lân istemez

Arzû-yı cennet ancak rü’yet-i dîdârdır
Yoksa ‘âşık yârsız seyr-i gülistân istemez

Mübtelâ-yı derd-i ağyâra tabîbim çâre ne
Haste-i hicrân olan tedbîr-i dermân istemez

İntizâr-ı mihnet ü cevrin çeker leyl ü nehâr
Sanma ‘uşşâkın harîm-i dilde mihmân istemez

Gayrılarla dâimâ sen ‘âlem eylersin yine
‘Âlemi sensiz Şeref billâh bir ân istemez