Ka’be-i vaslında kurbân olmağa cânlar fedâ
Tek irişsün ol makâma sâlik-i râh-ı fenâ

Zerre-vâr ey ‘âşık-ı sâdık mahv it kendini
Ta tecellî eyleye hurşîd-i nûr-ı Kibriyâ

Hâk-i pây-i ehl-i dil olmak durur devlet bugün
Kim kılup ehli ider hâki nazarla kimyâ

Ey bugün bu ‘âlem-i mülk içre gurbet-keş kişi
Bulagör bir rehber ile Hakk’a râh-ı ihtidâ

Hakkıyâ gir pûte-i ‘aşka vücûdun eyle lâl
Hâl ü kâli bir yana kıl bulasın sırr-ı Hudâ