Kapuna gelmişem yâ Rab tehî destim yüzüm kara
Ki kulluk itmedim sana ‘aceb hâlim nice ola
****
Şerî’at emrini tutub tarîka olmadım sâlik
Sanurdum kendimi ‘arif muhakkak Bâyezîd-âsâ
****
Hevâ-yı nefs ü İblise uyub itdim hatâ bî-had
Menâhî irtikâb itdim evâmir tutmadım kat’â
****
Riyâ’ ü süm’a vü taklîd ile celb eyledim nâsı
Bilür iken ki şöhret ‘âşıka bir fitne-i ‘uzmâ
****
Severdim medh-i nâsı havf iderdim zemlerinden hem
Baña hak söz diyen mebgûz idi sevmez idim asla
****
Edeb iz’ân haya nâmûs u ‘ân cümle terk itdim
Mecazî ‘ışk beni bu hâle koyub eyledi rüsvâ
****
İki nesne zelîl eyler buyurdı mer’î Peygamber
Biri şehvet biri hırsdur bu iki bende çok hâlâ
****
Mehâsinden melâ’ik yazmadı dîvânıma bir harf
Mesâvîde ma’âsîde velâkin olmışam yekta
****
Bu hâl-ile ümîdi kesmeyüb hîç rahmetinden ben
Dilerem mağfiret senden gice gündüz Hudâvendâ
****
Günâhım çoklığından var mıdır saña keder hergiz
Beni ‘afv eyleseñ rahmet tükenür mi ki bir derya
****
Hatâmı i’tirâf idüb ‘atanı isteyü geldim
Gerek ‘afv it gerek ‘adi it vezirin yok senin hâşâ
****
Velâkin ‘afv iderseñ dostlarım heb sevinişürler
Dahi gam-nâk olub heb cümle a’dâ zümre-i tersâ
****
Kamu dostlarının başı Muhammed Mustafâ kim ol
Baña atamdan erham oldığı malûm-durur saña
****
‘Azâb itseñ baña mahzun olur elbetde ol dostun
Olur bî-şübhe mesrur hem beni bağışlasan afla
****
Habîbin hakki-çün tard itme Kuddûsî günâh-kârı
Seniñ kapuñdan evsa’ var mı bir kapu ki ol vara

Ahmed Kuddusi