Kâşkî cismimde bin bin dîde peydâ eylesem
Her birin lü’lü’ dişin hecrinde deryâ eylesem

Mihr-i dünyâdan yumazsam el namâzım nâ-kabûl
Elde tesbîhim eğer ‘ıkd-ı süreyyâ eylesem

El değil cân pârelerdi gabgabın nârencine
Yûsuf-ı gül-çehremi ‘arz-ı Züleyhâ eylesem

Meş’al-i hurşîdi ‘Îsâ göndere ser-vaktime
Bezm-i ‘ıyşim câmını kandîl-i tersâ eylesem

Ey Hayâlî sîneme bir revzen açsa tîġ-i ‘aşk
Cân gözüyle bir nazar yâri temâşâ eylesem