Kendi isti’dâdı üzre her kişi bir işdedir
Vakt ü hâlinden teşekkî iderek teşvîşdedir

Kimsenin dönmez murâdı üzre bu çarh-ı felek
Seyr-i gerdûn cünbiş-i hizmet ile gerdişdedir

Ba’zı dünyânın zevâlin anlayup terk eyledi
Semt-i gûn-â-gûn-i ebleh ba’zı ârâyişdedir

Râgıbı havf u hatardan hâlî olmaz bir zamân
Târik-i âsâyiş-i dehr gamda pîş-a-pîşdedir

Genc-i lâ-yefnâ kanâ’at ile ta’rîf oldu çün
Nakd-i iksîr-i sa’âdet keşkül-i dervîşdedir

Geç makâmât u menâzil seyrini bul vasl-ı Hakk
Her makâma ki iresin bir murâdın pîşdedir

Çün fenâ-ender-fenâdan sonra irişe bekâ
Sırr-ı vahdet bu fenâya ‘aşk ile gerdişdedir

Hazz-ı nefs ile düşer elbette câhil gaflete
‘Ârif olan dem-be-dem nefsi ile teşvîşdedir

Çıkmadı ferzâne-dil bir beydak u fìl sürmedi
Esb-i himmet sür Salâhî şâh-ı rûhun kişdedir