Bu yer üzre niçe hân kondu göçdü
Ki bir hân içre bin hân kondu göçdü

Bu dünyâ bir köhne kârbân-serâydır
Ki niçe türlü kârbân kondu göçdü

Bu evde biz dahi çün bir konuğuz
Ki bunda niçe mihmân kondu göçdü

Dükeli hâce vü kul bay u yoksul
Gedâ vü şâh yeksân kondu göçdü

Kamusu ağlayu geldi vü geçdi
Eyit kangısı handân kondu göçdü

Ey niçe nâ-tüvân ile tüvânâ
Niçe dânâ vü nâ-dân kondu göçdü

Bu cümle halkı bir bir nevbet ile
Ögütdü bu değirmen kondu göçdü

Bu bâzâr içre her biri metâ’ın
Satuban kurdu dükkân kondu göçdü

Bu zehre hîç biri bulmadı tiryâk
Bu şehre niçe a’yân kondu göçdü

Pey-â-pey hâss u ‘âmm u redd ü makbûl
Kamu kâfir müselmân kondu göçdü

Cihânı hükmüne mahkûm idenler
Ecel hükmüne fermân kondu göçdü

Be-külli mü’min ü merhûm u mağfûr
Der-în pür cevr ü zindân kondu göçdü

Bu budakda ki şimdi biz konuğuz
Kamu kuş cümle doğan kondu göçdü

Niçeler geldi geçdi bu yuvadan
Ki öldü kamu doğan kondu göçdü

Selâtîn-i zamânı hep zemîne
Geçirdi çarh-ı gerdân kondu göçdü

İşitdik enbiyâ vü evliyâyı
Niçe zâr u perîşân kondu göçdü

Kanı ol Âdem ü Havvâ ki evvel
Bu milke geldi giryân kondu göçdü

Kanı Nûh u Halîl İshâk u Ya’kûb
Ya Yûsuf şâh-ı Ken’ân kondu göçdü

Niye mağrûr olasın sen bu milke
Çü Dâvûd u Süleymân kondu göçdü

Kanı İdrîs ü ya ‘Îse’bni Meryem
Dahi Mûsâ bin ‘İmrân kondu göçdü

Muhammed bunda ârâm itmedi hem
‘Atîk u Talha ‘Osmân kondu göçdü

‘Ömer Haydar Sa’îd ü Sa’d u ‘Âmir
Zübeyr ü ‘Abdurrahmân kondu göçdü

Bu on yâr ile âl ü ehl-i beyti
Kamu ahbâb u yârân kondu göçdü

Bize vü size dahi kala mı çün
Şuların bigi merdân kondu göçdü

Kanı İskender ü Kisrâ vü Kayser
Niçe fağfûr u hâkân kondu göçdü

Bu derde Câlinus itmedi dermân
Hem Eflâtûn u Lokmân kondu göçdü

Bu tâc u taht u bahta gırre olman
Ki bunca şâh u sultân kondu göçdü

Kanı Şeddâd u Takyânus u Nemrûd
Dahi Fir’avn u Hâmân kondu göçdü

Kanı Efrâsiyâb u Sâm u Behrâm
Cem ü Rüstem Nerîmân kondu göçdü

Niçe Nûşirevân oldu revâne
Niçe Husrev firâvân kondu göçdü

Kanı geydikleri ol türlü hil’at
Kamusu çünki ‘uryân kondu göçdü

Bu meydânı tutamadı biri hiç
O cümle pehlivânân kondu göçdü

Topu alamadılar çarh elinden
Kamusu saldı çevgân kondu göçdü

Şegâl ü tilküye kala mı mîşe
Çü her arslan u kaplan kondu göçdü

Kanı Sa’dî Celâlüddîn ü ‘Attâr
Veled Gülşehrî Elvân kondu göçdü

Kemâl Ümmî cihâna gırre olma
Çü senin bigi çendân kondu göçdü

Bu fen içinde bul fakr u fenâ kim
Niçe ‘allâme fennân kondu göçdü