Ey kubâb-ı ehadiyyetde nihân Kuşadalı
Bî-nişânlık sana bir şehper-i şân Kuşadalı
Bir hümâsın nice bin tâir-i kudsî peykin
Ey gönül kişverine sâye salan Kuşadalı

Meşrık-i nûr-i Alî’dir o cebîn-i pür-tâb
Şevket-i âl-i abâ şu’le-feşân Kuşadalı
Tâk-ı mihrâbını ebrûlarının kim görse
Kapanır secde-i ikrâra hemân Kuşadalı

Sermed-i devlet-i ferdiyyet ile sen oldun
Taht-ı irfâna Süleymân-ı zamân Kuşadalı
Görünür çeşmime Belkıs-ı Sabâ-yı ıtlak
Dâğ-ı aşkın olalı hâtem-i cân Kuşadalı

Zevk-i seyrân-ı müsemmâya dalar esmâdan
Şevk-ı tevhîdi cemâlinden alan Kuşadalı
Yükselir döne döne nûr-i “fenâfillâh”a
Mihr-i dîdârına pervâne olan Kuşadalı

Âşıkân şâm ü seher nağme-serâ-yı gülbenk
Evc-i rahmetden erip gûşe ezân Kuşadalı
Sardı hayret beni bâzâr-ı fenâda Sâmî
Bu ne âlem hem alan hem de satan Kuşadalı