Mahzen itmiş Hayy u Kayyûm sırrına insânı Hakk
Mazhar-ı esmâ sıfât u zât kılmış anı Hakk

Kudret ü ‘ilm ü irâdât u kelâm sem’ u basar
Sırr-ı tekvînde ne vâr kılmış ana ihsânı Hakk

Beytini vaz’ eylemiş bathâ-yı şehr-i âdeme
Devre mecbûr eylemiş etrâfına devrânı Hakk

Beytine şirk ü sanem erbâb-ı küfrü men’ içün
Sâhib-i huluk-i ‘azîme eylemiş fermânı Hakk

Kendi sevmiş kendi yapmış kendi bilmiş kendini
Kendi zâtında sıfâtın eylemiş seyrânı Hakk

Mülk anın memlûk anın cümle ‘avâlim ser-be-ser
Evvel âhir bâtın u zâhir ne var burhân-ı Hakk

Hakk görem dersen eğer gözsüz gönülsüz dilsiz ol
Dergehinden necm ile recm eylemiş Şeytân’ı Hakk

Zâtına mir`ât idüp ‘ilminde vech-i âdemi
Eylemiş îcâd sun’un görmeğe imkânı Hakk

İns ü cin ‘akl u melek eflâk u eşbâh her ne var
Ser-be-ser kim bi-emrillâh durur dîvân-ı Hakk

Ey Kemâlî kâm-ı nefsi terk iden kâmillere
Keşf ü halletmiş rumûz-i Hazret-i Kur`ân’ı Hakk