İşkun kime yar olur, daim işi zar olur
Dinmez gözünün yaşi, yanar içi nar olur

Sevda-yı zülfün kimün takıldı gerdanına
Mansur gibi akıbet yolında berdar olur

Leyla-yı ışkun senün, her kimi Mecnun ider
Firkat odına yakup, her gice bîmar olur

Varlık cibalun kesüp, dost iline yol ider
Ferhad’leyin gözinun, yaşları pınar olur

İbrahim Edhem’i derviş iden ışkundur
Derdüne düşen şahun tahtı tar mar olur

Ben de arı terk idüp girdüm bu dervişliğe
Her kim senün ışkına düşdi ise bî-ar olur

Bu yolda canun viren canan alur yirine
Işkı dükkanında anun canıyla bazar olur

İy dilber-i ruhani al koma iş bu canı
Sevdana düşeliden dünya bana dar olur

Terk it Niyazi seni bul anda ol sultanı
Her kim canından geçer ol vasıl-ı yar olur