Mâsivânın rengini boz gel boyan ‘aşk mûyına
Çağlayup ak durma seller gibi ‘irfân cûyına
Şol mürâî zâhidin aldanma hay u huyına
Çün riyâ hoş gelmez asla Kirdgâr’ın huyına
‘Aşkı rehber eyleyüp ‘azm eyle yârin kûyına
Ki temâşâ idesin anın kamer-veş rûyına

Hakk’a vuslat ister isen âteş-i ‘aşkına yan
Bahr-i ‘irfâna dalınmaz hacc u savm ile hemân
Yok hilâfım sözlerimde cümle gerçekdir inan
Buldu ‘aşk ile visâl-i yâri cümle sâlikân
‘Aşkı rehber eyleyüp ‘azm eyle yârin kûyına
Ki temâşâ idesin anın kamer-veş rûyına

‘Âr ü nâmûs şîşesini taşa çalup ‘âşık ol
Cümle vârını virüben ‘aşkı alup ‘âşık ol
Uyuban gavvâs-ı ‘aşka bahre dalup ‘âşık ol
Zühd ü takvâyı dahi ehline salup ‘âşık ol
‘Aşkı rehber eyleyüp ‘azm eyle yârin kûyına
Ki temâşâ idesin anın kamer-veş rûyına

Kişide ‘aşk olmayınca sanma Allah’ı bulur
Bu yola ‘aşksız gidenler dökülür yolda kalır
Kimini tutup harâmîler metâ’ını alır
Hâsılı bu ‘aşk u cezbe kadrini ‘ârif bilir
‘Aşkı rehber eyleyüp ‘azm eyle yârin kûyına
Ki temâşâ idesin anın kamer-veş rûyına

Gel bu Kuddûsî fakirin pendini eyle kabûl
Kim tutar ise bulur cümle murâdına vusûl
Şöyle bil kim ‘aşk yoludır Hakk’a giden doğru yol
Ber-murâd olmak dilersen nutkumu tut ey oğul
‘Aşkı rehber eyleyüp ‘azm eyle yârin kûyına
Ki temâşâ idesin anın kamer-veş rûyına