Mevlâ sever bil zâkiri hem sevdirir kullarına
Münkir ider buğz u hased olub muzırr inkârına
****
Eyler temennî mevtini bilmez ki ölmez ehl-i ‘ışk
Çünki iderler intikâl ‘uşşâkı Hak yanlarına
****
İki cihânın zîneti virmez safâ anlara hîç
Maksûdları itmek nazar her ân Hudâ dîdârına
****
Var cennetin içinde bir cennet adı Rıdvân-durur
Ol cennetin sükkânı bakmazlar cinân gülzârına
****
Lâyık değil ise dahi umar bu Kuddûsî anı
‘Arz itmeye eyler hayâ bu hâcetin dildârına

Ahmed Kuddusi