Katı çok gülme vardur ey püser mevt
Gelür bir gün virür zinhar keder mevt
****
Zelîl ü hor ider nice ‘azîzi
Nice şehbâzı eyler der-be-der mevt
****
Dem-â-dem devr ider eğlenmez asla
Demi yetmişleri arar gezer mevt
****
Hemân işi-durur dirnek tağıtmak
Ne evlâd kor ne ‘avrat kor ne er mevt
****
Ne a’lâ dir ne ednâ dir ne evsat
Hatır saymaz aman bilmez sürer mevt
****
Kime me’mûr olursa te’hîr itmez
Kimi tutar ise zinhar yıkar mevt
****
Ne ‘âlim dir ne câhil dir ne şeyh dir
Ne sıbyân dir hemân kabre tıkar mevt
****
Ne ‘âdil dir ne zâlim dir ne mazlum
Ne paşa dir ne beg dir ne nefer mevt
****
Ne sultân dir ne dervîş dir ne zengîn
Cemâ’âti perakende kılar mevt
****
Nice erbâb-ı tedbîrin sonunda
Nizâm ü hüsn-i tedbîrin bozar mevt
****
Nice eshâb-ı mâl ü mülk ü câhı
Gelüben cism ü canına kıyar mevt
****
Yüce bol köşklere sığışmaz iken
Karanlık tar yiri eyler makar mevt
****
Kopar küçük kıyamet geldiği dem
Kişinin başına halkı direr mevt
****
Virir gam ağladır evlâd u ehli
Akıdub gözlerinden yaş döker mevt
****
Yiyüb içüb giyüb şâdân olurken
Yetîm koyub boyunların büker mevt
****
Firar mümkin değil asla elinden
Kaçırmaz dir sana eyne’l-mefer mevt
****
Seni de şöyle bil Kuddûsiyâ kim
İder dost iline ehl-i sefer mevt

Ahmed Kuddusi