Ey şeh-i mülk-i nübüvvetde habîb-i ezelî
V’ey meh-i burc-ı risâletde edîb-i ebedî
Cümle bîçârelerin sensin elinde senedi
Ey Nebiyyü’l-‘Arabiyyü’l-Kureşiyyü’l-Medenî
Mislini halk eylemedi Hâlık-ı lem-yezelî

Cümle ‘âlem meh-i envârına pervâne döner
Mübtelâ âteş-i ‘aşkın ile her demde yanar
Gülşen-i hüsnüne cânlar eder efgân ile zâr
Ey Nebiyyü’l-‘Arabiyyü’l-Kureşiyyü’l-Medenî
Mislini halk eylemedi Hâlık-ı lem-yezelî

Durmada nisbete cân-bahşın ile arz u semâ
Vasf eder şânını Levh u Kalem u ‘Arş-ı a’lâ
‘Âşık-ı hüsn ü kemâlin ezelî Zât-ı Hudâ
Ey Nebiyyü’l-‘Arabiyyü’l-Kureşiyyü’l-Medenî
Mislini halk eylemedi Hâlık-ı lem-yezelî

Her sözün ma’den-i esrâr-ı delîl-i hikmet
Nûr yüzün mahzen-i envâr-ı cemîl-i vahdet
Tavr-ı özün âyîne-i Zât-ı Celîl-i Hazret
Ey Nebiyyü’l-‘Arabiyyü’l-Kureşiyyü’l-Medenî
Mislini halk eylemedi Hâlık-ı lem-yezelî

Hep nebîler serveri nûr-i mukaddemsin sen
Kenz-i envâr-ı müsemmâya mutalsamsın sen
Nass-ı Kur`ân-ı Kerîm ile mu’azzamsın sen
Ey Nebiyyü’l-‘Arabiyyü’l-Kureşiyyü’l-Medenî
Mislini halk eylemedi Hâlık-ı lem-yezelî

Bâb-ı lutf u keremin cümle cihân mu’temedi
‘Âciz u bîçârelerin bahş-ı şefâ’at senedi
Hep yüzü kârelerin meded-i müstenedi
Ey Nebiyyü’l-‘Arabiyyü’l-Kureşiyyü’l-Medenî
Mislini halk eylemedi Hâlık-ı lem-yezelî

Nûr-i zâtındır hemân hılkat-i ekvâna sebeb
Dört kitâb şânını i’lân u beyân eyler hep
Senden öğrendi cihân hikmet ile dîn ü edeb
Ey Nebiyyü’l-‘Arabiyyü’l-Kureşiyyü’l-Medenî
Mislini halk eylemedi Hâlık-ı lem-yezelî

Kapına geldi kulun lutf u ‘inâyet senden
Cümle halka kerem-i bahr-ı şefâ’at senden
Sâmî’ye rûz-i cezâ nûr-i hidâyet senden
Ey Nebiyyü’l-‘Arabiyyü’l-Kureşiyyü’l-Medenî
Mislini halk eylemedi Hâlık-ı lem-yezelî