Nice bu dîvân u yargu nice bu ceng ü savaş
Ecel irişdi ey hoca sırrını eyledi fâş

Nice nice diyesin sen cihân benim olsun
Nice bu zulm-i hisâbsız nice bu ehl-i tirâş

Sâni’i bil ki bilesin biliceğin aslın
Nice bu sun’-i cemâl u nice bu göz ü kaş

Bu nakş u sûret âşinâ âyîneye benzer
Bu nakş içinde bakasın görünüpdür nakkâş

Cihâna geldin özünü bilemedin gitdin
Çıkardı seni yolundan bu nakş u ‘akl-ı ma’âş

Nice bu yalan u gerçek benizetmece sözler
Nice bu kût-ı lâ-yemût nice bu etmek ü aş

Nice bu fikr-i bî-hûde esbâb-ı mülk ü diyâr
Nice bu zînet-i dünyâ nice bu mâl ü kumâş

Gelen gider bu cihânun kâidesi şoldur
Nice bu sağlık esenlik nice bu ‘ömr ü bu yaş

Kanı bu cihâna gelen bu sahrâda yitdi
Nöbet bu kez bize geldi ögünü dir kardaş

Belinleme ‘ömürün ipini çeker bir gün
Bu çerh-i gerd dahi sen şöyle sanma ki yavaş

Bu nakş-ı sûret ü cümbüş kılmadı ki vardır
Hakk’ı bilen insân oldı kalanı küllî heş

Dirîgâ hayf dirîgâ bilmedin özün
Bu kibr ü ‘ucb ü tekebbür bağrını eyledi taş

Fitende çüst ü çâlâksın ‘ibâdetde aksak
Gökçek uzun sakalın var sabâş hoca sabâş

Her ne ki gele yoluna Hakk’a şükür kıla
Hakk’ı hâzır görene ‘âşık niçün ola serkeş

Cihânda teferrücün var tasarrufun yokdur
Fâriğ ol Kaygusuz Abdâl hod u hoşbaş