Zâtınızdır iki cihânda hemîn
Hazret-i Hakk ile Resûl’e yakîn
Yücedir kadriniz çü ‘arş-ı berîn
Dise her dem sezâ dil-i gam-gîn
El-amân ey Çehâr-Yâr-ı Güzîn
Olun Allah içün fakîre mu’în

Gâlib oldukça nefs ü şeytânım
Nâr-ı haclet yakar dil ü cânım
Teşne-i âb-ı lutf u ihsânım
Mevc-i ‘ısyân aldı dört yânım
El-amân ey Çehâr-Yâr-ı Güzîn
Olun Allah içün fakîre mu’în

Çünki bi’z-zât sizsiniz ancak
Sevgilisi Habîbinin mutlak
Sözünüz redd ider mi Hazret-i Hakk
‘Arz-ı hâle kim ola sizden ehak
El-amân ey Çehâr-Yâr-ı Güzîn
Olun Allah içün fakîre mu’în

Her ne denli füzûn olursa günâh
Besdir ednâ nigâhınız billâh
Dâmen-i lutfunuz dil-i güm-râh
Tutsa dört el ile nola her gâh
El-amân ey Çehâr-Yâr-ı Güzîn
Olun Allah içün fakîre mu’în

Eyledim kendi kendimi her bâr
‘İllet-i ma’siyet ile bîmâr
Dem-i haşr eylemezse ger tîmâr
İderim nâr-ı dûzah içre karâr
El-amân ey Çehâr-Yâr-ı Güzîn
Olun Allah içün fakîre mu’în

Mefhar-ı ‘Âlemîn hürmetine
Cümle-i mürselîn hürmetine
Şer’-i islâm u dîn hürmetine
Dört kitâb-ı mübîn hürmetine
El-amân ey Çehâr-Yâr-ı Güzîn
Olun Allah içün fakîre mu’în

Şeref-i rû-siyâha rûz-i cezâ
Dilerim cümleniz ola şüfe’â
Nâsa lâyık mı olayım rüsvâ
Mücrim isem de ümmetim hamdâ
El-amân ey Çehâr-Yâr-ı Güzîn
Olun Allah içün fakîre mu’în