Yâ ilâhî beni ol dem ki idersin da’vet
Cânımı râh-ı visâlinde süvâr-ı ‘amel it
Gerdenimde koma bir kimseye aslâ minnet
Lutf u ihsânına bu merd-i garîbi mahal it

Sana mihmân olayım aç bana firdevse deri
Kevser-i feyzini sun tâ olam anınla diri
Çünki meydân-ı fenâda komuşam cân u seri
Beni al benden efendim seni ni’me’l-bedel it

Geçirüp cümle berâzih eleminden cânum
Şâd-mân eyle kulun vaslın ile sultânım
Virme yâ Rabbi benim hasm eline dâmânum
Her ne me’mûl ise tasdîk-i recâ vü emel it

Eyle Hakkı’ya nazar rûşen idüp iki gözün
Güldür Allahım efendim dem-i âhirde yüzün
Nice dünyâda anın şer’-i Resûl itdin izin
Âhiretde eserin sohbet-i Fahrü’l-Milel it