Yâ müferric eyle tefrîc giryemi rahm it bana
Çün vatanda olmışam pîr ü garîb ma’lûm sana
****
Kimse bilmez hâlimi disem inanmayub hemân
Yükledirler bana ahmâl-i sakîle dâ’imâ
****
Merhamet itmez biri birine hîç halk-ı cihân
Ben fakîre zahmet olur çün iderler iştikâ
****
Yazaram mektûb vücûha dinlemezler sözimi
‘Adet olmuş eylemek mazlûmlara cevr ü cefâ
****
Bu zemânda bulamaz sâlik huzûr-ı kalbi hîç
Sâ’ilin Kuddûsî nâçârdur telattuf it ana

Ahmed Kuddusi