Yeter oldun fenâ bâğında nâlân
Yürü bülbül yürü dost illerine
Edüp tâvûs-ı kudsîlerle cevlân
Yürü bülbül yürü dost illerine

Gülün rengine aldanma geçegör
Bu kesret merg-zârından uçagör
Varup vahdet şerâbından içegör
Yürü bülbül yürü dost illerine

Gülü sanma ki derdine devâdır
Sivâ hubbu çü beyhûde hevâdır
Ko gayrı maksad-ı aksâ Hudâ’dır
Yürü bülbül yürü dost illerine

Görüp pervâneyi andan sebak al
Göyündür nâr-ı ‘aşka per ile bâl
Mecâzı ko hakîkat bahrına dal
Yürü bülbül yürü dost illerine

Gönül verme Hüdâyî kâinâta
Geçüp fânîden er bâkî hayâta
Safâ bul gark olup envâr-ı zâta
Yürü bülbül yürü dost illerine