Her kime oldu nazar-ı zikr-i Hû
Oldu çü iksîr-i zer-i zikr-i Hû

Cümle garîbin vatanıdır çü Hakk
İdegör imdi sefer-i zikr-i Hû

‘Âlem-i ‘aynı ider elbet şühûd
Her kime irdi haber-i zikr-i Hû

Halka-i Hâ’yı göremez gözleri
Zâhid ider gör hazer-i zikr-i Hû

Dîde-i tevhîd ile eyle nazar
Tâ ki biline ‘iber-i zikr-i Hû

Doldu bu tevhîd ile kevn ü mekân
Çünki göründi eser-i zikr-i Hû

Hû’yu bilen niçe mutavvel yazar
Nüktelidir muhtasar-ı zikr-i Hû

Feth-i ilâhî ana âsân olur
Kim bula Hakkı zafer-i zikr-i Hû