Gül müdür bülbül müdür şol zâr u efgân eyleyen
Ten midir ya cân mıdır hem arşı seyrân eyleyen

Nâr u bad u âb u hâkin gel haber ver aslını
Kim bunların her birini emre fermân eyleyen

Âteşinkeremiyetinin sırrını duygur bize
Geh hilâf üzre anı kimdir gülistân eyleyen

Yelde kimdir geh nesîm ü geh sabâ zevkin veren
Gâhi hışmiyle nice buldânı vîrân eyleyen

Kimdir anı bana göster şol sularda durmayıp
Rûz u şeb yüz üstüne ‘aşk ile cevlân eyleyen

Hâk ne ma’dendir biter andan ma’âdin geh nebât
Kimdir anı gâhi hayvân gâhi insân eyleyen

Ay u gün yıldızları kim döndürür vergel haber
Hem ne seyr için dönerler bunca devrân eyleyen

Bâde birdir sâkî bir meclisdeki yârân da bir
Bâdenin keyfiyyetini kimdir elvân eyleyen

Kiminin mescidde boynun eğdirip zâhid kılan
Kimini meyhânede sarhoş u sekrân eyleyen

Zâhidin benzin sarartıp ağlatan kim hem nedir
Kâfirin küfrü dahi fâsıkda ‘isyan eyleyen

Halkdan ayırmış gözünü pinhâna çekmiş özünü
Ne arar kendini halkdan böyle pinhân eyleyen

Görse mahbûbu gönül bî-ihtiyâr mâil olur
Ehl-i derd ‘uşşâkı kimdir zâr u giryân eyleyen

Kim bu sırdan kimini mahrum edip câhil eden
Kimini mahrem edinip ehl-i ‘irfan eyleyen

Vahdet ehli cümlede bir yüzü seyrân etdiler
Lîk görmez ol yüzü kesretde tuğyân eyleyen

Ey Niyâzî kim vücûdun terk ederse ol durur
Cümle yüzler içre ol bir yüzü seyrân eyleyen