Çâr-taraf çâr-per ile pervâze kılma himmeti
Kesret-i emvâl içün boş yere çekme mihneti

Cüz-i ihtiyâr ile bir cüz-i kesbi ihtiyâr
Eyle emr etdi Teâlâ emre kıl itâati

Emrine fermân-ber ol sen rızk içün çekme elem
Artıramazsın muhakkak taksîm olan kısmeti

Bahre düşsen taksîminden fazla bir yudum su yok
Her ne kadar cem’ edersen dünyâda çok serveti

Bir güzergâhdır cihân şâh u gedâya kalmadı
İbret ile kıl nazar âleme al bir ibreti

Bu kitâb-ı kâinât bin ilm ü hikmet bahseder
LUTFİYA nûr-i basîretle oku bu hikmeti