Dalarken bahr-i vahdete
Çıkardım dürlü cevherler
Beni bugün bula sâlik
Bulundı dürlü dilberler

Muhakkak nûr-ı Hakk’ım ben
O iklîm-i hakîkatde
Tecellî eyledi bedrim
Göründi rûy-i dildârlar

Okundu Besmele ismim
Verildi Fâtiha resmim
Göründi hüviyyet ü cismim
Bulan bu yüzi anberler

Gören didi bana mutlak
Görenler oldılar ıtlâk
Muhakkak yüzidir hem Hak
Bulanlar didiler Kanber

Adım şehr-i melâmetde
Duyulmuş ankâ-yı mağrib
Okundı hutbe-i levlâk
Bu sırdır Hakk’a çenberler

Niceler cehd iderler hem
Göremezler bugün vechim
Anın-çün zâhidân bana
Didiler dahi ekferler

Küfrdür sırrımın zülfi
Dahi ol hâl-i ruhsârım
Bugün tutmuş hem âfâkı
Budur sırr-ı peyâmberler

Kulillâhu sümme zerhüm
Bugün sırrı bana geldi
Budur râh-ı hakîkat bil
Sakın sen olma serserler

Bugün diyen benden Hakk’dır
Sakın sen sanma insândır
Fedâî şehr-i ıtlâkda
Kuruldı vech-i minberler