Devredüp geldim cihâna yine bir devrân ola
Ben gidem bu ten sarâyı yıkıla vîrân ola
Cûş edüp ummân-ı can cismim gemisin dağıda
Yerler altında tenim toprak ile yeksân ola
Bu vücudum dağı kalka atıla yünler gibi
Şeş cihâtım açıla bir haddi yok meydân ola
Dört yanımdan nâr-ü bâb-ü âb-u hâk ede hücûm
Benliğim anlar alup bu varlığım talân ola
Dağıla terkibim otuziki harf ola tamâm
Nokta-i sırrım kamûnun cevherine kân ola
Cümle efkâr-ı havâsım haşr ola bir arsada
Kalkalar hep yeniden sankim bahâristân ola
Yevm-i Tüblâ’dır o gün her mânâ bir sûret giyer
Kimi nebat ve kimi hayvan, kimisi insân ola
Kabrime dostlar gelip fikredeler ahvâlimi
Her biri bilmekte âciz vâlih-ü hayrân ola
Her kim ister bu Niyâzî derdimendi ol zaman
Sözlerini okusun kim sırrına mihmân ola