Dilber-i gülber isterem ruhleri ahmer olmalı
Fâtih-i Hayber isterem yanında Kanber olmalı

Sahn-ı sînesi nûr ola cîm-i cemâli hûr ola
Güneş gibi fehûr ola öylece dilber olmalı

Mahvola dilde derd ü gam kal’ ola hem cünûd-i gam
Ma’dûm ola hudûd-i gam mîr-i muzaffer olmalı

Hayrân ola kemâline şems ü kamer cemâline
Reşk ede hatt u hâline âşık-ı şehper olmalı

Nazlı nezâketli baka dillere âteş bıraka
Âteşi cân-gâhı yaka emîr-i kişver olmalı

La’l-i lebi câm-ı celî meşrebi ola cilveli
Gerdende hâli müncelî zülüfler ejder olmalı

LUTFÎ letâfetli güzel intihâb-ı rûz-i ezel
Vasf edemez anı gazel Sa’dî gibi er olmalı