Evvel Huda’nın aşkına
Ey sâki doldur bir kadeh
Nûr-i hüdânın aşkına
Ey sâki doldur bir kadeh

Ol bâdeden her kim içer
Kayd-ı sivâlardan geçer
Eflâk-ı aşka per açar
Ey sâkî doldur bir kadeh

Mihr-i muhabbetler doğar
Esrâr-ı aşk kalbe sığar
Emtâr-ı hikmetler yağar
Ey sâki doldur bir kadeh

Ebvâb-ı rahmet açılır
Envâr-ı irfân saçılır
Mey-i muhabbet içilir
Ey sâki doldur bir kadeh

Mestâneler pür-nûr olur
Cebel-i diller Tûr olur
Gönül cinân cân hûr olur
Ey sâkî doldur bir kadeh

Zevk-ı derûn eyler zuhûr
Ol dem gönül bulur huzûr

Mestânelerdir kenz-i nûr
Ey sâkî doldur bir kadeh

Ol bâdenin mestânesi
İrfân dolar dilhânesi
Ma’mûr olur vîrânesi
Ey sâki doldur bir kadeh

Ol bâde ki ihsân olur
Her kim içer insân olur
Ma’nâda bir sultân olur
Ey sâki doldur bir kadeh

Her kim gider meyhâneye
Îmân dolar dilhâneye
Cân bahş eder peymâneye
Ey sâkî doldur bir kadeh

Ders-i arefden kim alır
Cânânını cânda bulur
Meyhâneyi LUTFÎ bilir
Ey sâki doldur bir kadeh