Ey sâkî-i devr-i zemân devrâne gel mestâne-veş
Ey fâtih-i dârü’l-emân meydâne gel peymâne-veş

Meyhâneler olsun güşâd mestâneleri eyle şâd
Zâhidler olalar irşâd mest-i müdâm rindâne-veş

Sâzendeler ursun sâzı sermestler etsün niyâzı
Meykeşlerin çâre-sâzı ol bu şem’a pervâne-veş

Zî-zevk ola dil-hâneler vecde gele peymâneler
Şevk vere şerâb-hâneler gerdenlere dürdâne-veş

Neyden hevâ meyden nevâ terk ola hubb-i mâsivâ
Sâkî kıl bu derde devâ şefîk ol şifâhâne-veş

Mey ki muhabbet bâğıdır leşker-i gamı dağıdır
Ravza-i cân çırâğıdır câne cândır cânâne-veş

LUTFÎ tarâb-hâneye var eyle tarâb ol bahtiyâr
Târibler olur müşg-bâr zülf-i dilberde şâne-veş