Men bugün elhamdülillâh mâsivâdan geçmişem!
Derd-i aşka nail olûben devâdan geçmişem!
İki deryânın suyun içirdiler düşde bana,
Mürşid olub aşk bana ucb ü riyâdan geçmişem!
Cümlesini eyledim nûş kalmadı bir katre hiç,
Bu ecilden halk ile bey’-i şirâdan geçmişem!
Bir deryânın mecâzî, aşk-ı hakiki biri,
Hak hidâyet eyleyüb sâir hevâdan geçmişem!
Çok sitem çektim mecâzi aşk yüzünden bîşumâr,
Taib olub şimdi dosttan mâadâdan geçmişem!
Verme sıklet bana zahid, yok senin ile işim,
Dahi cümle akraba ve âşinâdan geçmişem!
İstemem iki cihanın hubların şimden gerû,
Hakka âşık olûben aşk-ı nisâdan geçmişem!
Der bu Kuddûsî vefâ yokdur Hüdâdan gayrıda,
Yâr-i vâfi bulmuşum men, bîvefâdan geçmişem!