Her dü-âlem sizi Mevlâ şâd ü handân eylesün
Hikmet-i Rabbânî dilde derde dermân eylesün

Dâreyinde dest-gîr ola cenâb-ı zü’l-Celâl
Hak yolunda cânların cânâne kurbân eylesün

Hubb-i Mevlâ dilde dâim bahş ede zevk u safâ
Cezbe-i Rahmân gönülde devr ü cevlân eylesün

Kara Hâce hâcelerle Livâü’l-hamd altına
Cem’ ola rûz-i cezâda Mevlâ mihmân eylesün

Cümleten ehl-i îmânı cem’ ede Bârî Hudâ
Cennet-i a’lâ içinde câr-ı rıdvân eylesün

Sâcid ü râki’ olan efrâd-ı islâm zümresi
LUTFÎ müsterhim bugün Mevlâ sizi hân eylesün