Muharrem’dir bugün diller derûnu bâr-nâr olsun
Dökülsün yerlere gözler bütün yüzler gubâr olsun

Muharrem’dir bugün Âl-i abẩnın kan gülistânı
Açar gonce-i ahmerler cihâna müşg-bâr olsun

Muharrem’dir bugün derd ehline dermân yine derddir
Yakılsun odlara derd-i derûnu âşikâr olsun

Huseyn-i Kerbela’nın basdığı yerlere cân kurbân
Yezîd nâr-ı cehennemde çâr-etrâfı hisâr olsun

Huseyn’in nûr gülistânı cemâl-i bedr-i kudretdir
O mir’ât-ı Muhammed’i kıranlar târ u mâr olsun

Huseyn arş-ı mehâsindir bezenmiş nûr-i vahdetden
Yaratmış hazret-i Allah vücûdu dürr-i bâr olsun

Huseyn ser-defter-i Âl-i Muhammed’de muallâdır
Velâyet kubbesinde nûr güneş-veş pây-dâr olsun

O Şîmr-i bed-gümândır bî-emân âlemde bir mel’ûn
O sultân-ı selâtîne nasıl kâfir kıyar olsun

0 bûse-gâh-ı Muhtâr-ı İlâhî gerdene hançer
Çeken mel’ûn-i bed-ahter dü-âlem şerm-sâr olsun

Döker kan gözleri Zehrâ berâber Hayder-i Kerrâr
Muhammed Mustafâ ağlar bugün sabr ihtiyâr olsun

MUHAMMED LUTFÎ’ye lutfu olursa hazret-i Hakk’ın
Huseyn’in zîr-i akdâmı mahallinde gubâr olsun