Münevver nûr-ı Ahmedle cevâhir dopdolu bir zât
Anın medhinde şâhiddir nice âyât-ı tasnîfât
Husûsen nutk-ı Hakk-ile tekellüm eylemiş bil kim
Lisân-ı sırrı-ı ekberden nice esrâr u tedkîkât
Ki anın künhüne vuslatda yine andan ana lâyık
Ki minhü’l-bed’ ve ileyhi me’âd oldı ana âyât
Bi-vahyillah idüp şerh ol mutalsım kenz-i ahfâyı
Bilesin nûr-ı şems bi’z-zât zuhûr itdi idüp isbât
Kim ol bedr kim ol hurşid-i ke’sin sırr-ı Muhammeddir
Ki o mîrâs-ı Ahmedden bilirsin eyleme şübhât
Şerâfetle meğer bir zât ki Bosnada karâr itmis
Ki ol cevher-i yektâyı çıkardı kenz hem mir’ât
Ki üç günde tamam itdi Bedrî azîzim şârih
Mecâlü’z-zehrâ nâm şerh-i ke’sin gör nûr-ı hâcât
Zihî ol Bosnevî zât kim münevver oldı ol nûrla
O nûrun matla’ı oldı o nurla oldı hem lema’ât
Meğer ol şerh-i ra’nâyı nice medh ideyim bilmem
Ana şâhiddir metni eğer gördünse mu’cizât
Eğer nokta-i bismillâh desem ana tebessüm kıl
Anı nakş u hurûfdan bil mukaddes kıldı takdîsât
Benim haddim degil takrîz idem ol sırr-ı noktayı
Fakat ol ke’s bir âteş beni kılmış heme lezzât
Ki mağdûrum u mağlûbum eğer tatvîl idersem de
Divânerâ kalem nistdir işitin hem bana hâlât
Sakın küstahlık itme ey Fedâî vech-i Yûsufda
Hemân kıble tutun bil sen nicedir ol tecelliyyât