Seâdet-mend olup cânâ gözet dergâh-ı Mevlâ’yı
Doğar burc-i hidâyetden görürsün mihr-i vâlâyı

Gözünde nûr-i ibret var gönülde nûr-i hikmet var
Bütün eşyâ müderrisdir oku ilm-i muammâyı

Güneş gibi mücellâdır gözünde ma’rifet nûru
O nûru bahşeder tevhîd durup seyret bu eşyayı

Kitâb-ı sırr-ı Vahdet’dir bu eşyâda olan eşkâl
Bu mevcûd mûcide dâldir münevver kıl süveydâyı

Bu kâinât mükevvini eder isbât dahî Kur’ân
Bütün eşyâdan azher gör kerem-i Hak Teâlâ’yı

Nice bir Kadir ü Kayyûm verir erzâk bu mahlûka
Eğer kâfir eğer islâm yiyerler rızk-ı aʻlâyı

Yarın rûz-i kıyâmetde verir herkese lâyıkın
Muhammed ümmeti LUTFÎ bulur evvelce meʼvâyı