Senden dilerim dâimâ ihsânımı yâ Rab
Afv eyle beni cümle-i ihvânımı yâ Rab

Bu zümre-i ehl-i îmân olan sana kurbân
Sen eyle kabûl lutf ile kurbânımı yâ Rab

Ey şân-ı kerem afv ü kerem zâtına mahsûs
Sen eyle n’olur derdime dermânımı yâ Rab

Noksan mı olur bahr-i Kerîm’in kereminden
Bir katre ki ikmâl ede noksânımı yâ Rab

Ummân-ı kerem gark eder âlemleri v’allâh
Gözler göremez dergeh-i Rahmân’ımı yâ Rab

LUTFÎ gibi bir bende-i mücrim dahî var mı
Senden dilerim tekmîl-i îmânımı yâ Rab