Tasavvuf sâf-ı dilden hazret-i Allah’a dönmekdir
Tasavvuf ıstılâhâtı ile sanma öğünmekdir

Tasavvuf emr-i bi’llah ile dâim olmak elbettir
Yalınız sanma elfâz u ibârât beğenmekdir

Tasavvuf hasbeten-li’llâh bulursa ehlini söyler
Nukûşâtı makâlâtı makâmât mı güvenmekdir

Doğar havf-i Hudâ’dan ilm-i hikmet kalb-i âgâhe
Gönülde inzivâ eyler muhabbete tökünmekdir

Bu yolda ketm-i esrâr eylemek ağyârdan farzdır
Cehâlet perdesine zâhiren va’llah bürünmekdir

Tasavvuf sırrını nâ-ehline neşreyleyen zâlim
Verip nâmûsunu ağyâr eline kâre dönmekdir

Tasavvuf nüshaları var yine erbâbına mahsûs
Haramdır mübtedîlere haram ile sürünmekdir

Sabîlere tezevvüc lezzetin söyleyen ahmaklar
Hakîkatde olup sârık zâhir sâdık görünmekdir

Görünmezden mukaddem mihr-i ma’nâ kalb-i tâlibde
Güneşden bahsi kılmaklık hayâsızlardan olmakdır

Nice yüz bin makamâtı terakkî eylese âşık
Tasavvuf neşrine me’mûr olur mu bunu bilmekdir

Bu dînin a’zam-ı şartı kıyâs-ı nefs ü insâfdır
Yerinde sâmit u sâbir bu babda râhı almakdır

Mutasavvıf mütevâzî olur kor yerlere yüzler
Dayanıp LUTFÎ Mevla’ya îmân ile sevinmekdir