Hani bir câna lâyık cân haber-dâr ola cânımdan
Getirsin bir nişanı kim nişân vere nişânımdan

Benem bir murğ-ı lâhûti, mekânım lâ mekânidir
Göründüm sûretâ insân, cüdâyım âşiyânımdan

Beni reng-i anâsırda görüp ta’n etme ey zâhid
Ki yoktur çeşm-i Hak-bînin göre ‘ayn-ı ‘ayânımdan

Vücudum bağına esdi nesîm-i subh-ı Yezdâni
Sanasın ki hazan erdi geçirdi ad u sanımdan

Çün esrâr-ı ilâhiden haber-dâr olmadı ğâfil
Ne bilsin Zâtî’yâ onlar benim sırr-ı nihânımdan