Ey garib bülbül diyarın kandedir
Bir haber ver gül-izârın kandedir
Sen bu yolda kimseye yar olmadın
Var senin elbette yarin kandedir

Arttı günden güne feryadın senin
Ah u efgân oldu mu’tadın senin
Aşk içinde kimdir üstadın senin
Bu senin sabru kararın kandedir

Bir enisin yok acep hayrettesin
Rahatı terk eyledin mihnetdesin
Gice gündüz bilmeyip hayretdesin
Ya senin leyl ü neharın kandedir

Ne göründü güle karşı gözüne
Ne büründü baktığınca özüne
Kimse mahrem olmadı hiç razına
Bilmediler şehsuvar’ın kandedir

Gökte uçarken seni indirdiler
Çâr anâsır bendlerine urdular
Nûr iken adın Niyazi verdiler
Şol ezelki i’tibarın kandedir