Sad-hezârân şükr ana kim kamunun Hallâk’ıdır
Râygân cânlar bağışlar ‘âlemin Rezzâk’ıdır

Âferîn ol bâğbâna kim bu sun’u bâğının
Külli şey eşcârının esmârı vü evrâkıdır

Bî-zamân u bî-mekân u bî-nişân oldur hemân
Kibriyâ iki cihânda anın istihkâkıdır

Zü’l-celâl ü zü’l-cemâl ü bî-misâl ü bî-zevâl
Ber-kemâl ü lâ-yezâl oldur ki Dâim Bâkî’dir

‘İlm ü hilm ü fazl u lutf u rahmet u ‘afv u kerem
Setr ü vehb ü feth u ‘avn u ‘izz anın ahlâkıdır

Şeş cihâta doludur hem kaplamışdır ‘ilm ile
Her ne kim bu on sekiz bin ‘âlemin âfâkıdır

Evvel ü Âhir Ehad’dir Zâhir ü Bâtın Samed
Cümle mahlûkât anın dîdârının müştâkıdır

Hayy u Kayyûm u Ezel’dir Vâhid ü Ferd ü Ebed
Zihî sultân kim anın bu yüce dağlar tâkıdır

Ol kadehden kim elest vaktinde ervâh oldu mest
Mustafâ ol pâdişâhın meclisinde sâkîdir

Enbiyâ vü evliyâ vü asfiyâyı her zamân
Mest ü hayrân eyleyen ol meclisin sağrâkıdır

Yerde gökde vahş u tayr u cinn ü insân ü melek
Ol nigârın ‘aşkı şevki zevkinin zevvâkıdır

Ol habîbin derdi bizim derdimiz dermânıdır
Ol tabîbin zahmı bizim yaramız tiryâkıdır

Her ki ne dilerse bulur ol ganî dergâhdan
Redd idüp dimez ki bu sâlûs ol zerrâkıdır

Zihî cömerd pâdişâh kim dün ü gün cûyân iden
Yinilen bu cümle ‘âlem halkının erzâkıdır

Kamu merzûka müdâm ol kesmeden rızkın virir
Bahş olur her dem ne kim zühhâdı vü füssâkıdır

Dünye ni’metlerini ol virdi bize râyigân
Âhiret ni’metleri hem ‘ahdi vü mîsâkıdır

Oldu makbûl ol ki âmennâ vü saddaknâ didi
Kaldı merdûd ol ki anın münkiri vü ‘âkıdır

Kamu kâfir mihneti vâdîsinin ‘atşânıdır
Cümle mü’min rahmeti bahrinin istiğrâkıdır

Devlet anın kim ‘amel birle anı râzî kılar
Vay ana kim anı yazık kılmak ile kakıdır

Niçe döner gün ü ay u yaz u yay u güz ü kış
Bu ‘acâib ‘ibrete gözün vâr ise bakıdır

Kuvvetiyle bu yiri tutar u göğü döndürür
Kudretiyle yeller esdirir ü sular akıdır

Hikmetiyle dün ü gündüz kar u yaġmur yağdırır
Heybetiyle ra’d u berkı gürledir hem şakıdır

Ana kulluk kılamadın geçdi var ‘ömrün günü
Akşam oldu sen sanırsın kim henüz işrâkıdır

Kim ne kapudan ne dilek diler ise dilesin
Bu Kemâl Ümmî hemân ol kapunun dakkâkıdır

Bu mesâkin ol kapunun sâili olsa ne tan
Çün selâtîn ol kapunun bendesi ‘uşşâkıdır