Âdetim budur ezelden kevnde bir ş’en olurum
Dirilip geh cem olup gâhi perîşân olurum
Bu cihânın halkına bir bir yolum uğrar benim
Cem edip bunca kumaşı bezistân olurum
Geh sehâb-ü geh matar gâhi doluyum gâhi kar
Geh nebat-ü gâhi hayvân gâhi insân olurum
Geh Nasârâ geh Yahûdî gâhi Tersân geh Mecûs
Gâhi Şia gâh olur Sünnî Müsülmân olurum
Gâhi âbid gâhi zâhid gâhi fıska düşerim
Gâhi ârif gâhi ma’ruf gâhi irfân olurum
Gâh olur bakır, kalay ve gâh olur altun gümüş
Gâh olur âlemde her ma’denlere kân olurum
Gâh olur, benden hakîr hiç kimse olmaz dünyede
Gâhi Kâftan Kâf’a hükmeden Süleymân olurum
N’âl ile tırnak arasından yerim geh dar olur
Gâhi Arş-u Kürsî’den yek âlî meydân olurum
Gâh olur bu harmân-ı âlemde ben bir dâneyim
Geh kamûyu câmi olmuş ulu harmân olurum
Gâh olur mevcûd mâ’dum geh vücûdiyle adem
Geh tecelliyle iyân ve gâhı pinhân olurum
Gâhi dünyâ gâhi ukbâ gâhi mahşer geh sırât
Gâhi berzeh gâhi cennet gâhi nîrân olurum
Gâhi mâlik gâhi âteş gâhi zâkkum geh cahîym
Gâhi hûrî gâhi gılmân gâhi rıdvân olurum
Gâhi zerre geh güneş gâhi kamer gâhi nucûm
Gâhi arz-u geh semâ geh Arş-ı Rahmân olurum
Bunca sûretler libâsın gâh bir bir giyerim
Geh soyunup cümlesinden şöyle uryân olurum
Şimdi kesrette olan Âdem Niyâzî söylenür
Âlem-i vahdet içinde sırr-ı Yezdân olurum