Dil hânesi pür-nûr olur envâr-ı zikrullâh ile
İklîm-i dil ma’mûr olur mi’mâr-ı zikrullâh ile
Her müşkil iş âsân olur derd-i dile dermân olur
Cânın içinde cân olur esrâr-ı zikrullâh ile
Gamgîn gönüller şâd olur dem-besteler âzâd olur
Güm-geşteler irşâd olur âsâr-ı zikrullah ile
Zikreyle Hakk’ı her nefes Allah bes bâkî heves
Pes gayrıdan ümmîdi kes tekrâr-ı zikrullah ile
Ahmed seni ikrâr eder hem zikrini tekrar eder
İhlâsını iş’âr eder eş’âr-ı zikrullah ile