Fazl-u ihsânını itmâm ediver
Meded eyle meded İlâhî meded
İki âlemde berdevâm ediver
Meded eyle meded İlâhî meded

Kulluğundur efendi İzzetimiz
Hizmet etmektedir seâdetimiz
Sana lâyık hani ibâdetimiz
Meded eyle meded İlâhi meded

Kereminden bizi edüb îcâd
Mahzı fazlına verdin isti’dat
Eyledin çünki lütfuna mu’tad
Meded eyle meded İlâhî meded

Nice bir derdile hazîn olalım
Nîce bir hemdem-i enîn olalım
Fazl-ı ihsânına karîn olalım
Meded eyle meded İlâhî meded

Bir avuç hâki eyledin insân
Kudretinle zuhûra geldi cihân
Zuefâyı esirge ey Rahmân
Meded eyle meded İlâhî meded

Ey kamû hâle âlim ü dâna
Lütfunla olur fenâ vü bekâ
Bir efendi dahi yok ey Mevlâ
Meded eyle meded İlâhî meded

Nârı etdin Hâlîline gülzâr
Dağ u taş eyledi su üzre karar
Kıl inâyet HÜDAYÎ’ye her bâr
Meded eyle meded İlâhî meded