Ey sâkî-i kevser-nisâr
Doldur şerâb-ı eynemâ
Ey nâşir-i bû-müşgibâr
Doldur şerâb-ı eynemâ

Gözler seni mestâneler
Olsun güşâd meyhâneler
Pervâne-veş peymâneler
Doldur şerâb-ı eynemâ

Ey sâki-i devr-i zemân
Âşıklara dâru’l-emân
Ey himmet-i âb-ı revân
Doldur şerâb-ı eynemâ

Nûr-i hidâyet matla’i
Zât-ı füyûzât menbai
Dilden dile nûr melme’i
Doldur şerâb-ı eynemâ

Ey sâkî-i mey-i vefâ
Kalbe şerâbındır şifâ
Ey sohbeti bezme safâ
Doldur şerâb-ı eynemâ

Mestâneler dil-şâd ola
Divâneler irşâd ola
Kâmetleri şimşâd ola
Doldur şerâb-ı eynemâ

LUTFÎ’ye lutf eyle bu dem
Cânım fedâ nûr-i dîdem
Dil-hâne gözler dem-be-dem
Doldur şerâb-ı eynemâ