Ârif-i bi’llâh olan bîdâr olur vakt-i seher
Neş’e-mend-i sâki-i esrâr olur vakt-i seher

Hâb-ı gafletden uyan dergâh-ı Hakk’a tut yüzün
Cümle matlûb senünçün yâr olur vakt-i seher

Tâbi-i nefs-i hevâ mey u heves üftâdesi
Pister-i İblis’de bîmâr olur vakt-i seher

Sevk-ı ihsân-ı Hudâvendî küşâda aç gözün
Kâle-i vasl-ı kerem bâzâr olur vakt-i seher

Kişver-i dil mazhar-ı şâh-ı füyûzât olmaga
Bak tecellâ-yı İlâhî var olur vakt-i seher

Eyle reyyân teşne-i bâg-ı dili eşkün ile
Nahl-i pâk-i maksadunda bâr olur vakt-i seher

Fırsatı elden bırakma Kâmiyâ çeşm-i cihân
Feyz ile müstağrak-ı envâr olur vakt-i seher