Dü-cihânda zü’l-cenâheyn olmak istersin gönül
Sıdk ile teslîm ü te’dîb-vâr olup Pîrâne gel

İlm-i tevhîd sırrını neşreyleyen dilden dile
Diler isen hâk-i pây-i hazret-i insâne gel

Rûh-i pâki der-ezel kâmil idi âşıkların
Ten gılâfında tamâm tekmîl olan merdâne gel

Nûr-i Hakk’ı hazret-i Cânân gözüyle gözleyüp
Öz gözün a’mâ kıluben bir azîm seyrâne gel

Defter ü dîvâne sığmaz metn-i insânı eğer
Şerhede ashâb-ı irfân deryâ-yı ummâne gel

Ehl-i zevkın gönlü mir’ât-ı dilârâdır müdâm
Seyreder kendi yüzün kendindeki sultâne gel

LUTFÎ’dir mahlas bana ismim Muhammed’dir güzel
Lutfedüb Tanrı ( Allah )Teâlâ ey gönül şükrâne gel